ದನ ಕಾಯೋನು ಚಿತ್ರದಲ್ಲಿ ಸೈಬೀರಿಯಾದ ಮಾಡೆಲ್‌ ನತಾಶಾ ಸ್ಟ್ಯಾನೋವಿಕ್‌ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈಗಾಗಲೇ ಬಾಲಿವುಡ್‌ನ ಚಿತ್ರಗಳಲ್ಲಿ ಬೋಲ್ಡ್‌ ಆಗಿ ನಟಿಸಿರುವ ಇವರು, ಪ್ರಥಮ ಬಾರಿಗೆ ದಕ್ಷಿಣ ಭಾರತದ ಸಿನಿಮಾ ರಂಗಕ್ಕೆ ಪದಾರ್ಪಣೆ ಮಾಡಿದ್ದಾರೆ.
- ಶರಣು ಹುಲ್ಲೂರು
ಬಾಲಿವುಡ್‌ನ ಅನೇಕ ಚಿತ್ರಗಳಲ್ಲಿ ಸಖತ್‌ ಹಾಟ್‌ ಆಗಿ ಕಾಣಿಸಿಕೊಂಡವರು ಸೈಬೀರಿಯಾ ಮೂಲದ ಮಾಡೆಲ್‌ ನತಾಶಾ ಸ್ಟ್ಯಾನೋವಿಕ್‌. ಹಿಂದಿಯ ಬಿಗ್‌ಬಾಸ್‌ನಲ್ಲೂ ಇವರು ಪ್ರೇಕ್ಷಕರನ್ನು ಮೋಡಿ ಮಾಡಿದ್ದರು. ಅಂತಹ ಮಾಡೆಲ್‌ ಕಂ ನಟಿಯನ್ನು ಇದೇ ಮೊದಲ ಬಾರಿಗೆ ಕನ್ನಡಕ್ಕೆ ಕರೆತಂದಿದ್ದಾರೆ ನಿರ್ದೇಶಕ ಯೋಗರಾಜ್‌ ಭಟ್‌. ಇನ್ನಷ್ಟೇ ರಿಲೀಸ್‌ ಆಗಬೇಕಿರುವ 'ದನ ಕಾಯೋನು' ಸಿನಿಮಾದಲ್ಲಿ ಇವರಿಗೆ ಪ್ರಮುಖ ಪಾತ್ರ ನೀಡಿದ್ದಾರೆ. ದನ ಕಾಯೋನು ಸಿನಿಮಾ ಗ್ರಾಮೀಣ ಹಿನ್ನೆಲೆಯಲ್ಲಿ ಮೂಡಿಬಂದಿದ್ದರೂ, ಹಾಟ್‌ ಬೆಡಗಿಗಾಗಿಯೇ ಡಿಫರೆಂಟ್‌ ಪಾತ್ರವನ್ನೇ ಕ್ರಿಯೇಟ್‌ ಮಾಡಿದ್ದಾರೆ ಭಟ್ಟರು.
ಇದರಲ್ಲಿ ದನ ಕಾಯುವವನ ಪಾತ್ರದಲ್ಲಿ ದುನಿಯಾ ವಿಜಯ್‌ ಮಿಂಚಿದ್ದರೆ, ಹಳ್ಳಿ ಹುಡುಗಿಯಾಗಿ ಪ್ರಿಯಾಮಣಿ ಕಾಣಿಸಿಕೊಂಡಿದ್ದಾರೆ. ಈ ಜೋಡಿಯ ಜತೆ ಸಾಗುವ ಮತ್ತೊಂದು ಪಾತ್ರವೇ ನತಾಶಾ ಸ್ಟ್ಯಾನೋವಿಕ್‌ ಅವರದ್ದು. ಹಾಗಾಗಿ ಇಂಥದ್ದೊಂದು ಪಾತ್ರ ತಮಗೆ ಸಿಕ್ಕಿದ್ದಕ್ಕೆ ಹೆಮ್ಮೆ ಪಡುತ್ತಾರೆ ಇವರು.
'ದಕ್ಷಿಣ ಭಾರತದ ನನ್ನ ಮೊದಲ ಸಿನಿಮಾವಿದು. ಫಸ್ಟ್‌ ಟೈಮ್‌ ನಾನು ಇಂಥದ್ದೊಂದು ಪಾತ್ರ ಮಾಡಿರುವೆ. ನಿರ್ದೇಶಕರು ಎಷ್ಟು ಹೇಳಿಕೊಟ್ಟಿದ್ದರೋ, ಅದನ್ನಷ್ಟೇ ಮಾಡಿದ್ದೇನೆ. ಸ್ಯಾಂಡಲ್‌ವುಡ್‌ ಪ್ರೇಕ್ಷಕರು ನನ್ನ ಪಾತ್ರವನ್ನು ಇಷ್ಟಪಡುತ್ತಾರೆ ಅನ್ನುವ ನಂಬಿಕೆ ನನ್ನದು' ಅಂತಾರೆ ನತಾಶಾ.
ಅದೊಂದು ನಂದಿ ಗುಡ್ಡ ಅನ್ನುವ ಊರು. ಸಿಕ್ಕಾಪಟ್ಟೆ ಹಸು ಅಲ್ಲಿವೆ . ಫಾರಿನ್‌ ರಿಸರ್ಚ್‌ ಟೀಮ್‌ವೊಂದು ಈ ಹಸು ನೋಡೋಕೆ ಹಳ್ಳಿಗೆ ಬರುತ್ತದೆ. ಆ ಟೀಮ್‌ ಅನ್ನು ಕರೆದುಕೊಂಡು ಬರುವ ಹುಡುಗಿಯೇ ನತಾಶಾ. ಆಕೆ ಅಲ್ಲಿಗೆ ಬಂದು ಹಸುಗಳ ಬ್ಲಡ್‌ ಬ್ಯಾಂಕ್‌ ಶುರು ಮಾಡ್ತಾಳೆ. ಅಲ್ಲಿಂದ ಸಿನಿಮಾಗೆ ಹೊಸ ತಿರುವು ಸಿಗುತ್ತದೆಯಂತೆ. ನಂತರ ಕತೆ ಎತ್ತ ಸಾಗುತ್ತದೆ, ಏನೆಲ್ಲ ಆಗುತ್ತದೆ ಅನ್ನುವುದನ್ನು ಈಗಲೇ ಹೇಳಲಾಗದು ಅನ್ನುವುದು ನಿರ್ದೇಶಕರ ಮಾತು. ನತಾಶಾ ಅವರನ್ನೇ ಕರೆತಂದಿದ್ದಕ್ಕೆ ಬಲವಾದ ಕಾರಣವಿದೆಯಂತೆ. ಸಿನಿಮಾ ನೋಡಿದ ಮೇಲೆ ಅದು ಪ್ರೇಕ್ಷಕರಿಗೆ ಅರ್ಥವಾಗಲಿದೆ ಅಂತಾರೆ ಯೋಗರಾಜ್‌ ಭಟ್‌.
ದನ ಕಾಯೋನು ಸಿನಿಮಾದಲ್ಲಿ ನತಾಶಾ ಜನೆಟಿಕ್‌ ಎಂಜಿನಿಯರ್‌ ಪಾತ್ರ ಪೋಷಿಸಿದ್ದಾರೆ. ಸಂಶೋಧಕಿ ಆಗಿರುವ ಈಕೆಯು ಹಳ್ಳಿಯಲ್ಲಿ ಏನು ಮಾಡುತ್ತಾಳೆ ಅನ್ನುವ ಕೌತುಕವನ್ನೂ ಈ ಸಿನಿಮಾ ಬಿಚ್ಚಿಡಲಿದೆಯಂತೆ. ನತಾಶಾ ಒಳ್ಳೆಯ ಡಾನ್ಸರ್‌ ಕೂಡ. ಈ ಕೌಶಲವನ್ನು ಸಮರ್ಥವಾಗಿ ಬಳಸಿಕೊಳ್ಳಲೆಂದೇ ಇವರಿಗಾಗಿ ಹಾಡೊಂದನ್ನು ಸೃಷ್ಟಿಸಿದ್ದಾರೆ ನಿರ್ದೇಶಕರು. ನಾಯಕನ ಪಾತ್ರದ ಪರಿಚಯ ಹಾಡಿನಲ್ಲಿ ನತಾಶಾ ಸಖತ್‌ ಸ್ಟೆಪ್‌ ಹಾಕಿದ್ದಾರೆ.
***
ಹಳ್ಳಿ ಸೊಗಡಿನಲ್ಲಿ ಮೂಡಿಬಂದಿರುವ ಚಿತ್ರವಿದು. ಗ್ರಾಮೀಣ ಬದುಕು ಯಾರಿಗೆಲ್ಲ ಮುಖಾಮುಖ ಆಗಲಿದೆ ಎಂಬುದನ್ನು ನತಾಶಾ ಪಾತ್ರದ ಮೂಲಕವೂ ಹೇಳುವ ಪ್ರಯತ್ನ ಮಾಡಿದ್ದೇನೆ. ಒಂದೊಳ್ಳೆ ಕ್ಯಾರೆಕ್ಟರ್‌ ಮೂಲಕ ಅವರು ಸ್ಯಾಂಡಲ್‌ವುಡ್‌ಗೆ ಪರಿಚಯ ಆಗುತ್ತಿದ್ದಾರೆ.
-ಯೋಗರಾಜ್‌ ಭಟ್‌, ನಿರ್ದೇಶಕ
