ದುಬೈ: ಅಬು ಧಾಬಿಯಲ್ಲಿರುವ ಭಾರತೀಯ ಮೂಲದ ವ್ಯಕ್ತಿ 12 ಕೋಟಿ ರೂ.ಗಿಂತ ಅಧಿಕ ಮೊತ್ತದ ಲಾಟರಿ ಗೆದ್ದಿದ್ದಾರೆ.
ಭಾನುವಾರ ಘೋಷಣೆಯಾದ ಅಬು ಧಾಬಿಯ ಬಿಗ್ ಟಿಕೆಟ್ ಡ್ರಾನಲ್ಲಿ ಕೇರಳ ಮೂಲದ 33 ವರ್ಷದ ಶ್ರೀರಾಜ್ ಕೃಷ್ಣನ್ ಕೊಪ್ಪಕೆಂಬಿಲ್ ಅವರು 7 ದಶಲಕ್ಷ ದಿರ್ರಾಮ್(ಸುಮಾರು 12,71,70,000 ರೂ.) ಲಾಟರಿ ಹಣ ಗೆದ್ದಿದ್ದಾರೆ.
'ಬಿಗ್ ಟಿಕೆಟ್ನಿಂದ ಲಾಟರಿ ಗೆದ್ದಿರುವ ದೂರವಾಣಿ ಕರೆ ಬಂದಾಗ ನನಗೆ ನಂಬಲಾಗಲಿಲ್ಲ. ಈಗಲೂ ನನಗೆ ಲಾಟರಿ ಬಂದಿರುವುದನ್ನು ನಂಬಲಾಗುತ್ತಿಲ್ಲ,' ಎಂದು ಕಳೆದ 9 ವರ್ಷಗಳಿಂದ ಸಂಯುಕ್ತ ಅರಬ್ ಎಮಿರೇಟ್ಸ್ನಲ್ಲಿ ರೇವು ಸಮನ್ವಯಾಧಿಕಾರಿಯಾಗಿ ಕೆಲಸ ಮಾಡುತ್ತಿರುವ ಕೃಷ್ಣನ್ ಸಂತೋಷಭರಿತರಾಗಿ ಹೇಳಿದರು.
ನನ್ನ ಅದೃಷ್ಟ ಸಂಖ್ಯೆ 44698 ಎಂಬುದು ನನಗೀಗ ಮನವರಿಕೆ ಆಗಿದೆ ಎಂಬ ಕೃಷ್ಣನ್ ಹೇಳಿಕೆಯನ್ನು ಖಲೀಜ್ ಟೈಮ್ಸ್ ವರದಿ ಮಾಡಿದೆ.
'ನಾನು ನಿಯಮಿತವಾಗಿ ಲಾಟರಿ ಟಿಕೆಟ್ ಖರೀದಿಸುತ್ತಿದೆ. ಆದರೆ ಎಂದೂ ಬಹುಮಾನ ಗೆದ್ದಿರಲಿಲ್ಲ. ಆದರೆ ಈ ಬಾರಿ ಖರೀದಿಸುವಾಗ ಇದೇ ನಾನು ಖರೀದಿಸುತ್ತಿರುವ ಕೊನೆ ಟಿಕೆಟ್ ಆಗಲಿ ಎಂದು ನಿರ್ಧರಿಸಿದ್ದೆ. ಆದರೆ ಅದೃಷ್ಟವೂ ನನ್ನ ಪಾಲಾಯಿತು. ಅದರೂ, ಇದೇ ನನ್ನ ಕೊನೆಯ ಲಾಟರಿ ಟಿಕೆಟ್,' ಎಂದು ಕೃಷ್ಣನ್ ತಿಳಿಸಿದ್ದಾರೆ.
'ಉದ್ಯೋಗದಲ್ಲಿ ತಿಂಗಳಿಗೆ 6,000 ದಿರ್ರಾಮ್ (ಸುಮಾರು 1.09 ಲಕ್ಷ ರೂ.) ಸಂಪಾದಿಸುವ ಕೃಷ್ಣನ್, ಭಾರತದಲ್ಲಿ ಮನೆ ಕಟ್ಟಲು ಪಡೆದಿರುವ ಸಾಲ ತೀರಿಸಲು ಲಾಟರಿ ಹಣ ಬಳಸುವೆ. ನನ್ನ ಪತ್ನಿಯೂ ಇದನ್ನೇ ಬಯಸಿದ್ದಾಳೆ. ಆಕೆ ಅಬು ಧಾಬಿಯಲ್ಲಿ ಖಾಸಗಿ ಕಂಪನಿಯೊಂದರ ಆಡಳಿತ ಸಹಾಯಕಿಯಾಗಿ ಕೆಲಸ ಮಾಡುತ್ತಿದ್ದಾಳೆ,' ಎಂದು ತಿಳಿಸಿದ್ದಾರೆ.
ಇಬ್ಬರೂ ಸಂಯುಕ್ತ ಅರಬ್ ಎಮಿರೇಟ್ಸ್ನಲ್ಲೇ ಕೆಲಸ ಮುಂದುರಿಸಲು ನಿರ್ಧರಿಸಿದ್ದೇವೆ. ನಮ್ಮ ಪಾಲಿಗೆ ಅದೃಷ್ಟ ಇಲ್ಲೇ ಖುಲಾಯಿಸಿರುವಾಗ ನಾವೇಕೆ ಈ ದೇಶವನ್ನು ತೊರೆಯಬೇಕು. ಭವಿಷ್ಯಕ್ಕಾಗಿ ವಿಶೇಷವಾಗಿ ಯಾವುದೇ ಯೋಚನೆ ಮಾಡಿಲ್ಲ ಎಂದು ಕೃಷ್ಣನ್ ತಿಳಿಸಿದ್ದಾರೆ.